الحلقة الاولي
ينهار ابيض الساعة بقت اتنين بعد نص الليل، هروح ازاي انا دلوقتي
بصيت للراجل اللي جمبي وقولتله(الساعه بقت اتنين يا عم انا لازم اروح امي هتنفخني)
اتكلم معايا برجاء (معلش يا انسه انا اسف والله بس مكنش في قدامي غيرك يشهد في المحضر وخصوصا ان انتي الوحيده اللي شوفتي الحرامي وهو بيسرق المحل بتاعي)
ودي اخرة الجدعنه، يارتني كنت اتعميت قبل ما اشوفه،كتمت غيظي وقولتله( اديني اهو متمرمطه معاك في القسم بقالي ٣ ساعات وياريته بفايده ويعرفوا يمسكوا الحرامي)
اتكلم امين الشرطه بعجرفه(يلا يا بني انت وهي روحوا ولما نمسك الحرامي هنبقى نبلغكم تيجو تتعرفوا عليه)
اتكلم صاحب المحل ( انا مش هتحرك من هنا يا باشا لحد ما ترجعولي فلوسي وحاجتي اللي اتسرقت والانسه وقفه معايا اهيه وشاهده)
خلاص انا جبت اخري من الراجل دا، دا مكانتش علبة جبنه اللي دخلت اشتريها من المحل بتاعه، يقوم يدخل الحرامي في نفس الوقت ويسرق المحل وميبقاش في شاهد غيري انا، قولتله بعصبيه (بص يا عم الحاج انا كدا عملت اللي عليا واكتر من اللي عليا شويه، انا مش واقفه مع حد وكفايه عليكم اوي لحد كدا، سلامو عليكم)
سبتهم ومشيت وانا عايزه اجري، امي هتولع فيا علي كل التأخير دا، شغلي في الكوافير بيخلص الساعه ١١ والساعه دلوقتي بقت ٢ هعمل ايه بس وهروح ازاي دلوقتي، يخربيت الجبنه اللي فكرت اشتريها، ما كنت روحت كلت مسقعه باحترامي، لازم يعني اعمل فيها بنت ناس واروح اشتري جبنه.
قبل ما اخرج من القسم لقيت عساكر ماسكين رجاله وستات استغفرالله العظيم ملفوفين بالملايات، شكلهم لسه ممسوكين دلوقتي، وقفت في جنب على ما يعدوا، غمضت عيني عشان مشوفش المناظر دي، عماله استغفر في سري، فجأة حسيت ان في حد واقف قدامي، فتحت عيني ببطئ، لقيت واحد واقف قدامي وبيبصلي، شكله نضيف كدا وابن ناس، ماسك في ايديه جهاز لاسلكي، بيبصلي بطريقه غريبه اوي، قلبي دق بخوف لما شوفته معرفش ليه، اتكلمت معاه بخوف( خير يا باشا في حاجه ضايعه منك وبتدور عليها في وشي)
اتكلم باستخفاف( دا انتي دمك خفيف بقى)
يارب صبرني على الليلة اللي مش عايزة تعدي دي، مسكت اعصابي ورديت عليه ببرود ( ولا خفيف ولا تقيل روح لحالك الله يسهلك وسبني اروح لحالي)
ضحك ضحكه خفيفه كدا واتكلم بتريقه على كلامي(حالك ايه اللي تروحيله في وقت زي دا، انتي ممسوكه في ايه بالظبط)
هو يقصد ايه بممسوكه دي هو فاكرني ايه، دا لازم يعرف هو بيكلم مين كويس، خدت نفسي كدا براحه وقولتله(لا بقولك ايه انا مش بتاعت الكلام دا انا واحده سلاحي في الحياه هو شرفي وبعدين انت متعرفش انت بتكلم مين )
ضحك تاني واتكلم بتريقه(بكلم مين يعني؟)
بصتله بغيظ وقولتله بلا فخر(انت بتكلم احسن كوافيره في مصر)
ضحك تاني وحرك راسه كدا من غير ما يقول ولا كلمة، قرب مننا عسكري وحيَّاه باحترام وقاله (دخلنا المتهمين كلهم الحبس يا سيادة الرائد)
ينهار مش فايت رائد.. دا انا شكلي هتعلق في القسم للصبح.
بصلي من فوق لتحت وفجأة ضحك وكأنه افتكر حاجه، اتكلم مع العسكري وهو بيبصلي وقاله(متأكد ان انتوا دخلتوا كل المتهمين الحبس؟ )
رد العسكري باحترام (ايوا يا فندم)
ضحك اكتر وهو بيبصلي وقال للعسكري(بس في واحده من المتهمين لسه مدخلتش الحبس)
